Il chantun Grischun vul segirar il provediment da sanadad decentral per l'avegnir. In team che represchenta blers interess specifics reelavura perquai actualmain las cundiziuns generalas strategicas en il Model directiv concernent l'organisaziun dal provediment da la sanadad. Sin fundament dal nov model directiv vegnan er preparadas adattaziuns da leschas.
En il focus dal provediment da sanadad stattan la populaziun dal chantun ed ils giasts che sa trategnan qua. Tut tenor la stagiun da l'onn èn quai tranter 200 000 e 400 000 persunas. En il chantun Grischun èn correspundentamain blers furniturs da prestaziuns dal sectur da sanadad suttamess a fermas variaziuns stagiunalas. «Pervia da sia topografia e la structura da la populaziun è il chantun Grischun confruntà en il sectur da sanadad cun sfidas spezialas», di Peter Peyer, schef dal Departament da giustia, segirezza e sanadad. «Cun il nov model directiv vulain nus stgaffir las cundiziuns generalas per in futur provediment da sanadad decentral ch'è stabil.»
En il chantun Grischun vegn il provediment da sanadad decentral garantì tras in vast spectrum da furniturs da prestaziuns. Quest spectrum cumpiglia ils ospitals acutsomatics, ils Servetschs psichiatrics dal Grischun (SPGR), las instituziuns da reabilitaziun, las chasas da tgira, la Spitex e Palliative Care, las organisaziuns da salvament e la cussegliaziun da geniturs e plinavant er las medias ed ils medis da chasa, las medias ed ils medis che pratitgeschan libramain, las spendreras sco er las fisioterapeutas ed ils fisioterapeuts.
La demografia, las persunas spezialisadas ed ils svilups medicinals influenzeschan ils scenaris dal futur
Facturs sco la demografia, la topografia, il turissem, las persunas spezialisadas sco er la digitalisaziun ed ils svilups en la medischina, l'infrastructura dal provediment ed il svilup dals custs influenzeschan il futur da la politica da sanadad dal Grischun. Quests differents facturs vegnan integrads en l'elavuraziun dal nov model directiv. Cumpetent per il nov model directiv è in team central che represchenta blers interess specifics e che vegn manà da la scienziada da sanadad Marion Thalmann. Il nov Model directiv concernent l'organisaziun dal provediment da la sanadad duai sa concentrar sin la perioda dal 2026 fin il 2036 e vegn elavurà, cun integrar las acturas ed ils acturs dals fatgs da sanadad, fin la primavaira 2026.
Dapli infurmaziuns: Model directiv concernent il provediment da la sanadad
Infurmaziuns:
Cusseglier guvernativ Peter Peyer, schef dal Departament da giustia, segirezza e sanadad, tel +41 79 712 51 57 (cuntanschibel da las 15.00 fin las 16.00), e‑mail medienstelle@djsg.gr.ch
Responsabladad: Departament da giustia, segirezza e sanadad