Per la 28avla giada ha il chantun Grischun publitgà ina concurrenza per promover projects gronds da la lavur culturala professiunala. Da las tut en tut 39 dumondas èn tschintg projects vegnids onurads cun ina contribuziun d'ovra u cun in stipendi liber. La summa totala importa 100 000 francs.
Cun ils daners da sustegn da la concurrenza survegnan artistas ed artists la pussaivladad da lavurar vi d'ina ovra creativa, e quai senza squitsch finanzial e professiunal. La finamira è quella da pussibilitar il svilup tematic da projects culturals. Il dretg da sa participar a la concurrenza han artistas ed artists professiunals che han lur domicil dapi almain 2 onns en il chantun Grischun u ch'èn colliads stretgamain cun il chantun Grischun u cun la cultura grischuna. La Cumissiun da concurrenza ha giuditgà quest onn tut en tut 39 dumondas ord las spartas da l'art applitgà e da l'art figurativ, dal film, da l'istorgia e memoria, da la litteratura, da la musica, dal saut e dal teater.
Il schef dal Departament d'educaziun, cultura e protecziun da l'ambient, cusseglier Jon Domenic Parolini, ha decidì – sin proposta da la Cumissiun da concurrenza e da l'Uffizi da cultura – davart la surdada da las contribuziuns ad ovras.
Las suandantas tschintg persunas che lavuran sin il champ cultural han survegnì ina contribuziun d'ovra da mintgamai 20 000 francs:
- Num: Mathias Balzer, Cuira
Naschì ils: 5 d'october 1967
Sparta: Litteratura, istorgia e memoria
Project: «Kulturjournalismus – ein Plädoyer für die Zukunft»
- Num: Martina Caluori, Cuira
Naschì ils: 12 d'avust 1985
Sparta: Litteratura
Project: «Parabeln der Pinus»
- Num: Anik Casutt, Thalwil/Sagogn
Naschì ils: 6 da zercladur 2000
Sparta: Musica
Project: «Weiterentwicklung als Singer-Songwriterin»
- Num: Lisa Collomb, Cuira
Naschì ils: 8 da settember 1984
Sparta: Art figurativ
Project: «slow mode»
- Num: Chris Hunter, Basilea
Naschì ils: 29 da zercladur 1983
Sparta: Art figurativ
Project: «Die Nachfrage oder die dritte Ahnung»
Dapli infurmaziuns:
Infurmaziuns:
Andrea Conrad, manadra Promoziun da la cultura, tel. +41 81 257 48 07 (cuntanschibla da las 09.00 fin las 10.00), e‑mail Andrea.Conrad@afk.gr.ch
Responsabladad: Uffizi da cultura / Promoziun da la cultura